Kufunqukile ukuzithemba kwiChippa United endwendwela iPolokwane City ngempelaveki
ULuc Eymael uvakalise uvuyo emva kokuba iChippa United ibethe iOrbit College emdlalweni obuseBuffalo City Stadium, eMonti.
Image: Pedro Mapelo
Iqela lebhola ekhatywayo laseMpuma Koloni, iChippa United, liza kuthatha uhambo olusingise eLimpopo likhuthazekile emva kokuphumelela umdlalo wokuqala kule sizini entsha. Oku kulandela emva kokuba iChippa izibethele iOrbit College ngamagowuli amabini kwelinye emdlalweni weBetway Premiership obubanjelwe eBuffalo City Stadium, eMonti, kubusuku bangoLwesibini kule veki. Amagowuli amabini afakwe nguXolani Sithole kwisigaba sokuqala nanguJustice Figareido kwisigaba sesibini ancede iChippa emdlalweni obupholile.
Amanqaku amathathu ayinyusele kwindawo yeshumi elinesine iChippa United. Ngoku inamanqaku amane ewaqokelele emidlalweni emithandathu eyidlalileyo kule sizini. Zithe xibilili izibilini kuLuc Eymael ongene ezihlangwini zikaMusa Nyatama owagxothwa emva komdlalo omnye awabamba kuwo kuba kugxothwe uSinethemba Badela naye owakhonjwa emnyango emva kwemidlalo emibini kuphela engumqeqeshi. Ukunqaba kweziphumo ezicacileyo kwiChippa kuhambelene ngqo nokuwilizela kolawulo okwenziwe ngabaphathi bayo.
Noxa umdlalo weChippa ibingenguwo lowa uqhelekileyo – kodwa ukuphumelela kuza kubanceda abadlali abaphantsi koxinizelelo. Uwamkele ngovuyo amanqaku amathathu uEymael emva komdlalo wakhe wesibini engumqeqeshi weChippa United. "Namhlanje sibone iziphumo zomsebenzi esiwenze ejimini ngethuba sifumene ikhefu leFIFA. Silungise iimpazamo ezininzi ezenzeke emidlalweni egqithileyo. Umdlalo ubungagqibelelanga ngendlela ebendifuna ngayo ngoba kufakwe igowuli kuthi. Ndicinga ukuba ngesifake amagowuli amaninzi," utshilo uEymael waseBelgium.
Njengokuba iChippa United iza kuthathana nePolokwane City emalanga (15:00) ngoMgqibelo, umqeqeshi uthe kunyanzelekile ukuba babuyele ekhaya befumene amanqaku apheleleyo. "Kubalulekile ukubuya namanqaku apheleleyo emidlalweni ekude nekhaya esiya kuyo. Siyafuna ukunyukela kwindawo ebhetele kwiBetway Premiership. Impumelelo esiyifumeneyo ibalulekile ngoba ndibacelile abadlali ukuba bazame ukusebenza ngamandla. Ndinethemba lokuba iziphumo zanamhlanje ziza kusinceda emdlalweni olandelayo," utshilo uEymael emva komdlalo ogqithileyo.