UHlumelo Pantyo unomnqweno wokudlalela iBorder Bulldogs!
UHlumelo Pantyo, ongumdlali onekamva eliqaqambileyo embhoxweni, unonqweno wokudlalela iBorder Bulldogs emva kokuziqaqambisa kwiBrutten Top 10 esongwe kwiiveki eziphelileyo. Lo mdlali weLovedale Collage oneminyaka eyi23 ukuthethe oku kwincoko yakhe neli phephandaba ekuqaleni kwale veki.
Emva kokwenza indima ebonakalayo kwiLovedale College ebithelekiswe nooxholovane kwiBrutten, uPantyo uye watyunjwa njengoyena mdlali obalaseleyo kwitumente ebixhaswa nguTekkie Town. Oku kwenzeke nakubeni iqela lakhe lingakwazanga ukufika kwimidlalo yokugqibela yetumente entsha yeBorder Rugby Union.
Esi sisiququ seLovedale Collage sivale itumente siphakathi kwabadlali abafumene iitrayi ezintlanu. "Ndiyakunqwenela ukunxiba la mibala yeBorder Bulldogs. Naphaya ndifike ndisebenze kakuhle xa uThixo enokundipha amandla okuqhubela phambili nekhondo lam lokudlala umbhoxo. Xa kunokwenzeka oko, ndingalivuyela ithuba lokuya kumaqela amakhulu," utshilo uPantyo ongabambekiyo xa edlala ebaleni.
Emva kokuvunywa ngabachongi ukuba ungumdlali oqaqambileyo, ukuzithemba kufunqukile kakhulu kuPantyo. Okuthe kwancumisa ngeBrutten kukuba inike abadlali abangaphaya kwamakhulu amabini ithuba lokudlala umbhoxo osemgangathweni ophezulu kudityaniswe amaqela ombhoxo amancinci namakhulu phantsi kweBorder Rugby Union.
Uvumile ukuba bekunzima ukudlala kwitumente enamaqela amakhulu aquka iFort Hare Blues ephumelele indebe, iWSU All Blacks neSwallows enamakhwahla. UPantyo ubulele umqeqeshi wakhe uSoso Kiva onconywe kakhulu ngenxa yomdlalo weLovedale obumhle kwiBrutten. "Ndibulela owayengumqeqeshi wethu, uSoso Kiva, oogxa bam - amadoda anenyaniso. Ngaphandle kwabo, bendingazukulifumana iwonga," utshilo uPantyo.
Yena uKiva uncome abadlali ngokudlala ngokuzimisela kwiBrutten. "Zange sifumane thuba lokuzilungiselela kakuhle - kodwa iqela lenze umsebenzi oncomekayo futhi labonisa ukuba lingadlala kwinqanaba elingaphezulu kweBorder Rugby. Ndibulela kakhulu abazali babadlali esisebenzisene kakuhle phambi kokubeka phantsi kwam njengomqeqeshi weLovedale," utshilo uKiva. Indebe yokuqala yeBrutten iphunyelelwe yiFort Hare Blues ebethe iSwallows emdlalweni wokugqibela eMdantsane.