UHugo Broos uthi mabatshintshe igiya aBafana Bafana

Abadlali beqela lesizwe loMzantsi Afrika babila besoma enkampini phambi komdlalo obalulekileyo ekuthambekeni kwale veki. UMzantsi Afrika udibana neCongo Brazzaville emdlalweni ohlakulela i2025 Afcon oza kube ubanjelwe eNelson Mandela Bay Stadium ngorhatya (19:00) lwangoLwesihlanu.

Nangona amalungiselelo weqela likaHugo Broos ephazanyiswe kukungabikho kukaThalente Mbatha owonzakeleyo noJayden Adams - kodwa kunyanzelekile lilwele impumelelo ukuze landise amathuba okuya kwiAfrica Cup of Nations.

UBroos uthi ulindelele umdlalo obhetele kubafana bakhe emidlalweni yomibini kaGroup K. Oku kulandela ukungadlali kakuhle ncam emidlalweni egqithileyo nakubeni bengabethwanga. Emdlalweni wokuqala eSoweto, uMzantsi Afrika wabambana ne-Uganda ngo'2-2 phambi kokubetha iSouth Sudan ngongciphu ka'3-2.

UBroos uthi ufuna ukubona aBafana Bafana bedlala into ecacileyo eGqeberha. Ngaphezulu koko, ufuna amanqaku amathandathu - hayi into engaphantsi kwawo. "Ndifuna amanqaku amathandathu kule midlalo emibini esiza kuyidlala. Andiwubonanga uMzantsi Afrika endiwaziyo emidlalweni egqithileyo.

“Ndifuna lo ndiwaziyo xa sidlala neCongo," utshilo umqeqeshi izolo ethetha neentatheli eGqeberha. "Indlela iqela elidlale ngayo emidlalweni egqithileyo khange indonwabise nakubeni iziphumo zayo ndizamkele. Khange ndoneliseke ziziphumo zomdlalo esiwudlale ne-Uganda ngoba ndandifuna impumelelo," utshilo umqeqeshi.

Uvumile ukuba izinto zithande ukwahluka emva kokuba uMzantsi Afrika ubuyele kwiAfcon ekuqaleni kwalo nyaka . "Kukho uxinizelelo ngoku ngoba kufuneka iqela ligcine indlela nomgangatho eliwubonise kwiAfcon ekuqaleni konyaka. Imidlalo kufuneka ilawulwe sithi futhi sidlale ngokuzithemba.

“Ndiqinisekile singawafumana amanqaku amathandathu emidlalwenii emibini esijongene nayo," uvale ngaloo mazwi uBroos. UBathusi Aubaas noSinoxolo Kwayiba bathathe iindawo ezishiywe nguThalente Mbatha owonzakeleyo noJayden Adams ogxothiweyo nguBroos.