Igqithe igxanya iPortugal ukuya kwiTop 16 Fifa World Cup

Ayanda ngoku amaqela azibekela indawo kumjikelo olandelayo weNdebe yeHlabathi. Namhlanje iPortugal igxanye yangena ingxamile kwiTop 16 Fifa World Cup emva kokubetha i-Uruguay ngamagowuli amabini eqandeni emdlalweni obumhle obuseLusail Iconic Stadium. Omabini amagowuli wePortugal afakwe ngumdlali weManchester United, uBruno Fernandes, kwisigaba sokuqala somdlalo. Ngoku iPortugal ihleli phezulu inamanqaku amathandathu emva kokuphumelela imidlalo emini. Ibuye ixwaye impazamo iPortugal ekhefini emva kokudlala into engacacanga kwisigaba sokuqala somdlalo. Into enokuyibalisa iPortugal kukuba izamile ukulwa kungafakwa gowuli kuyo.

Ibixheshwa futhi khange ikwazi nokukhabela unozinti we-Uruguay kuso sonke isigaba sokuqala somdlalo. Kuphantse kwalalwa kungatyiwanga ngethuba uRodrigo Bentancur eyicanda kubini iPortugal phambi kokubanjwa kwebhola yakhe nguDiogo Costa ezipalini. Ukuba uRodrigo ebekwazile ukufumana igowuli, ngekuthethwa ezinye iindaba ngoku ngoba iUruguay ibinamandla emdlalweni. Emva kokufakwa kwegowuli lokuqala nguBruno Fernandes, kuye kwakho ukuzithemba kubadlali bePortugral. UBruno ukhabe ibhola engaphaya komhlaba kanozinti yayongena. UCrisitiano Ronaldo ukhe wacinga ukuba lelakhe igowuli – kodwa abakamabonakude bayilungisile lo nto kwakucaca ukuba ibhola khange imchike entloko.

Emva kwemizuzu emva koko, UFernandes ufumene ipenela emva kokushiya amadoda ezizigede phantsi. Uyikhabe ngokwakhe yangena uBruno olisekela likaRonaldo oye wakhutshwa kwisigaba sesibini somdlalo. Abadlali be-Uruguay baza kusonga iimpahlaza bagoduke emva kokubethwa yiPortugal namhlanje ngoba akusekho nto enokubanceda kuGroup H. Ukuba iGhana ingazama ukubetha iUruguay, iSouth Korea ingayibethi iPortugal – lo nto iza kunceda iGhana. Okuye kwakubi emdlalweni kukuphuma kukaNuno Mendes owonzakeleyo futhi ekuthiwa kunikwenzeka angaphindi adlale kwakhona kwiFifa World Cup yalo nyaka eseQatar.